لماذا لم نستطع السيطرة على مرض السرطان ؟ - ساينسوفيليا
لماذا لم نتوصل لعلاج نهائي للسرطان ؟
سؤال بديهي جدا
ومنطقي
ليه الانسان اللي قدر يطلع القمر , يسخر الكهربا , ويسيطر على
انواع فتاكة من الفيروسات زي الجدري , وقدر يخترع الكومبيوتر , وقدر يوصل لتسلسل
المادة الوراثية , ييجي قدام مرض السرطان ويعلن استسلامه وعجزه عن السيطرة عليه
؟!!!
لينك الحلقة : ليه مش عارفين نهزم مرض السرطان ؟ - العلم بيقول ايه
................
السرطان عبارة عن
مرض بينشأ نتيجة انقسام غير محكوم للخلايا نتيجة تراكم الطفرات في ال DNA
السرطان عموما منقدرش نختزله ونعتبره مرض
واحد لأ للاسف هو عبارة عن عدة امراض تقريبا حوالي 200 مرض
لكن علي وجه الأخص السرطان نفسه متوصف علي
انه مرض نتج عن خلل جيني والخلل الجيني ده سبب خلل وظيفي ف خلايا جسمنا اللي حصل
فيها الخلل الجيني ده
……………
وكلنا عارفين ان الجينات هي المسؤوله عن
التحكم في الخلايا بتاعتنا وطريقة عملها وانقسامها ووظيفتها لحد م الخليه تنهي
مسيرتها بسلام وتموت والجسم يتخلص منها وييجي غيرها ....
وبكده لما هيحصل خلل جيني مسبب للسرطان
هينتج عنه خلايا بتنمو وتنقسم بشكل سريع وبشكل مستمر .. خلايا غير وظيفية وغير
سليمه .. خلايا مقاومه للموت المبرمج اللي ربنا حاطه ف كل خليه بحيث انها تموت
نفسها بعد م تنهي فترة حياتها علي خير او بما يسمي (apoptosis)
او (programmed
cell death) 
.................
طيب بمنتهي البساطة كدة ايه أوجه الاختلاف
بين الخلية العادية والخلية السرطانية ؟
اهم صفة علي الاطلاق ان الخلية السرطانية
خلية متمردة خلية ثورجية غير منضبطه وخرجت عن كل القواعد اللي الجسم فارضها علي كل
شعب الخلايا
الخليه السرطانية بتنقسم وبتتكاثر بعشوائية
وجنون ومش هتموت وهتقدر تقاوم اشارات الموت المبرمج !!!
مش بس كدة
دي كمان هتستغل وتفرض سيطرتها علي الخلايا
الطبيعية والأوعية الدموية والخلايا المناعية المجاورة ليها علشان تشتغل عندها
لحسابها وتبقي اكتر شراهه وقوة وعدد وتتغذي كويس وكأنها عملت انقلاب عسكري علي
نظام الجسم !!!
………………
الأدهى والأغرب انها هتستخدم انواع من
الخلايا المناعية ف الجسم بعد فرض سيطرتها علشان تتخفي عن الجهاز المناعي وتتغلب
عليه
كمان مش هتسكت دي هتعمل حاجة اسمها
angiogenesis عملية فمنتهي الخطورة
هتخلي الأوعية الدموية القريبة تنبت اوعية دموية فرعية للورم السرطاني علشان يتغذي
ويكبر ويتنقل له قدر مناسب من الأكسجين والمواد الغذائية
…………………
وبعد كده تيجي اسوأ صفة علي الاطلاق
وابشعها وهي قدرة الخلية السرطانية انها تتنقل عن طريق مجري الدم من عضو لعضو ااخر
عن طريق عملية ال metastasis
او الانتقال
…………………
و الغالبية العظمي من حالات الوفيات بتكون بسبب الاورام الانتقالية
metastatic lesions
يعني مثلا ممكن مريض سرطان الثدي يحصل
انتقال للخلايا السرطانية وتعمل ورم ثانوي تاني ف الكبد او العضم 
..........................................................................
طيب يا تري ايه اسباب وعوامل السرطان عموما
؟!!
1- الجينات زي م قولنا
2- العوامل السرطانية زي
التدخين وهنتكلم باستفاضة ف حلقة قادمة عن التدخين وقد ايه مرتبط بالسرطان فوق م
نتخيل !!
3- بعض انواع العدوي
الفيروسية زي مثلا فيروسc وفيروس
b وارتباطهم بسرطان الكبد
فيروس الايدز وفيروس الhpv
4- مواد كيميائية مسرطنة
زي الافلاتوكسين وارتباطه بسرطان الكبد والأسبستوس وارتباطه بسرطان الرئة والبنزين
وغيره وغيره
5_ الاشعاع المؤين
والمواد المشعة
.........
عرفنا الفرق بين الخلية السرطانية والخلية
العادية 
عرفنا ان السرطان يتوصف كمرض نتج عن خلل
الجينات والخلل عمل كارثة ف انقسام الخلايا ومقاومتها للموت
تعالوا ندخل جوه الخلية اكتر كده ونبص ع
الجينات 
ونسأل سؤال
What are drivers of cancer ? 
عندي تلات تغييرات جينية رئيسية مسببة
للسرطان
1- proto.oncogenes
ودي جينات بتتحكم وتحفز نمو وانقسام
الخلايا
لو حصل طفرة mutation ف الجين اللي من النوعية دي او activation اكتر من اللازم
هيحصل انقسام ونمو مستمر للخلايا ويسبب
حدوث سرطان
2-tumor suppressor
الجينات الكابحة للأورام ودي جينات بتحكم
عملية الانقسام ف الخلايا زي كدة حضرة الناظر بتاع الخلية 
ونفس النظام لو حصل فيها طفرة واتعطلت هنا
تحصل المصيبه
3-DNA repair genes
دي جينات بتصلح اي تدمير بيحصل فتتابع ال
DNA وبالتالي هتحمينا من
حدوث طفرة ف المادة الوراثية بتاعتنا تعمل سرطان 
شوف حكمة ربنا حاطط لك كام خط دفاعي للتحكم
فمسار انقسام الخلية يمنع حدوث سرطان ليك 
..........
طب يا تري هل في عوامل خطورة تزود من فرصة
حدوث السرطان ؟
طبعاااا
Risk factors of cancer
1-السن
2-الجنس
3-الهرمونات
4-الأشعة الفوق
البنفسجية وخصوصا التعرض المبالغ فيه للشمس
5-الكحوليات والتدخين
6-الالتهابات المزمنة
7-مثبطات المناعه
8-النظام الغذائي
والسمنة المفرطه
9-بعض العدوي الفيروسية
زي مقولنا سابقا
.................
نيجي بقى لسؤال
الحلقة
ليه لحد دلؤت متغلبناش على مرض السرطان
الإجابة ( بسبب كل ما سبق )
بس هزيدك من الحب
جانب واكلمك بشكل مستفيض
العلم في الحرب الضروس بينه وبين السرطان محتاج انه يطور من آليات الدراسة والبحث
بشكل اكبر من كده لإن زي ما شوفتوا السرطان مرض ذكي وماكر وخبيث
السرطان معقد بشكل لا يصدق ومتنوع بشكل غريب
في اكتر من 100 نوع من انواع السرطانات
........
العلاجات المعتادة للسرطان بتكون الجراحة والعلاج الكيميائي والعلاج الاشعاعي
وكذلك العلاج الهرموني والعلاج الموج
في كتير من
الحالات بتكون العلاجات دي فعالة والمريض بيبقى خالي من السرطان بعدها , لكنها
بعيدة كل البعد عن كونها فعالة بنسبة 100 %
.....................
على المستوى البحثي بيتم دراسة السرطان عن طريق خطوط من الخلايا مزروعه في
المختبرات وبيتم تطوير معظم علاجات السرطان عن طريق ال خطوط الخلوية دي
وبتكون مستنبته من الأورام البشرية
بالرغم من ان الخلايا السرطانية المزروعه دي حسنت فهمنا لطبيعة السرطان وبيولوجيا
الأورام الا انها تفتقد لبعد التعقيد
اللي بيكون عليه السرطان داخل الجسم
..............
لذلك بيكون في أدوية كتير نكتشفها وتكون فعالة ف المعمل والتجارب على الخلايا ولما
نطبقها على المرضى الحقيقيين بتفشل فشل ذريع
..............
مش بس كده ده في الورم السرطاني نفسه في المريض الواحد
انها ممكن تكون مكونه من تجمعات من الخلايا السرطانية اللي مختلفة قليلا عن بعضها ويعمل
حاجة اسمها ال subcloning
يعني الورم نفسه
جواه خلايا مختلفة عن بعض في الطفرات لكنها تابعه لنفس نوع الورم
أحد الامثلة على كده احد الاورام العنيفة اللي بتصيب المخ اسمه ال glioblastoma
ممكن يحتوي على 6 نسائل فرعية مختلفة في نفس
المريض يعني كأنك بتحارب 6 انواع سرطان فنفس الورم ونفس المريض لو حابب تقرأ وتطلع
اذا كنت متخصص في علوم السرطان إقرأ عن ال
clonal heterogeneity
طبعا الاختلاف ده
في نوع النسائل هينعكس على فاعلية العلاجات فنلاقي ان العلاج ممكن يكون فعال ضد
نسيلة فرعية دونا عن الاخرى من نفس الورم .
………….
حاجة كمان ان
الورم ده عبارة عن نظام ديناميكي تفاعلي الخلايا السرطانية فيه بتكون على تواصل مستمر
مع بعض ومع الخلايا السليمة المحيطة وزي ما ضربتلك مثال انها ممكن تحفز الاوعية
الدموية القريبة من الورم لتشكيل اوعية دموية تمتد للورم وتغذيه
...........
كمان تقدر تسيطر
على الجهاز المناعي علشان تمنعه من التعرف على السرطان ومهاجمته
...............
ده غير ان الابحاث الاخيرة بتركز على نوع من الخلايا اسمها خلايا السرطان الجذعية
اللي بيكون ليها خصائص مقاومة عالية للعلاج الكيماوي والاشعاعي
.............
كمان اذا فرضنا ان
تم التخلص من الورم كله الا خلية واحدة بس سرطانية ف الخلية دي عندها القدرة على
تكوين ورم كامل لوحدها
...........
ولو حلينا كل
المشاكل دي نلاقي ان الخلايا السرطانية قدرتها عالية جدا على التكيف ومواجهة اي
ضغط خلوي بيتطبق عليها علشان تستمر في الحياة
يعني مثلا لو
بنعالج ورم بالاشعاع ممكن تقوم بعض خلايا الورم السرطانية بتغيير طريقة التعبير
الجيني ليها وتبقى اكتر مقاومة للاشعاع
..........
بس بالرغم من كل
المحبطات دي العلم قدر يتوصل لنجاحات كبيرة جدا في مجابهة الورم السرطاني
وحصل انخفاض ملحوظ من السبعينات لحد دلؤت في معدلات الوفيات الاحصائيات بتقول ان
في السبعينات كان معدل نجاة مريض السرطان اول 5 سنين 50% وحاليا وصل 65 %
اما معدل النجاة اول 10 سنين كان 25% واصبح 50 %
في نهاية حلقتنا أسأل الله الشفاء لكل مريض ويارب تكون الحلقة عجبتكم متنسوش تعملو
لايك وسبسكرايب وشير الفيديو لو هينفع غيرك وشاركني في الكومنتات بمواضيع علمية
حابب نطرحها
مع السلامة
التعليقات على الموضوع