شغف العلم الذي لا ينتهي

لماذا يتميز مخ الإنسان عن بقية الكائنات ؟ - ساينسوفيليا

 لماذا يتميز مخ الإنسان عن بقية الكائنات ؟ ( مقال بالعامية المصرية )

كتابة : محمد ياسر الصدفي
باحث في العلوم الطبية

لماذا يتميز مخ الإنسان عن بقية الكائنات ؟ - ساينسوفيليا
مبدأيا كدة من قبل ما تقرأ فالمقال لن يجيب على أي تساؤل بشكل قاطع لكن المقال ده محاولة مني اني افهم ليه احنا متميزين ؟

ليه مخ الانسان بيتميز بالميزة الفريدة على سطح الكوكب كله بين الكائنات وهي ميزة ( الوعي )
مخ الانسان اللي بيظل مستمر في النمو لحين الثبات ووصول حجم الذروة في العقد الرابع من العمر ده مدوخ العلماء والباحثين

تعالى سريعا نبص على نتايج دراسة على 46 انسان عن طريق الرنين المغناطيسي ع المخ
هنلاقي ان متوسط حجم المخ حوالي 1274 سم مكعب
متوسط حجم مخ الرجل اكبر من المرأه , مخ الرجل يقع بين 1053 الى 1499 سم مكعب اما المرأه حوالي 975 ل 1398 سم مكعب ولا عزاء للفيمينيست !!
......................
في دراسة لحجم المخ بعد وفاة اتنين من كبار الأدباء كان مخ الروائي الروسي ايفان تورجنيف حوالي 2521 جرام يعني حوالي اتنين كيلو وحاجه اما الكاتب اناتول فرانس كان حوالي 1017 جرام يعني كيلو وحاجه !! يعني اقل من نص حجم الروائي الروسي والاتنين أدباء !!
........
في حياتنا اليومية بنقابل ناس معالجتها للمعلومات الجديدة بتكون ابطأ وناس تانية معالجتها للمعلومات بتكون اسرع وافضل !! لكن احنا لحد دلؤت مش عارفين نقف على سبب واضح لعنصر الذكاء واختلافه من فرد لآخر يعني زي ما قولت مثلا في فرق فالحجم بين مخ الراجل والست الفرق ده بينتج عنه زيادة في عدد الخلايا العصبية في الدماغ الامامي المسؤول عن اللغه والمنطق والمعالجة للرجل حوالي 4 مليار خلية ( 23 مليار خليه عصبية للرجل و 19 مليار للست )
😃
ومعلش انا بتخيل الفيمينست هنا وبضحك تاني .
ده في حالة لو بصينا لأبناء الجنس الواحد الأمر بجد محير لان مفيش اختلاف جوهري في معدلات الذكاء بين الرجل والمرأة
تعالوا نبص بقى على الأجناس الأخرى !!
.........
اذا خرجنا من اطار الجنس البشري هنصاب بالحيرة بشكل اكبر لان حيوانات كتير او معظم الحيوانات قادرة على التكيف والتصرف المعقد والتخطيط واتخاذ القرار ولديهم ايضا سلوكيات اجتماعية !!
....
النحل مثلا بيقدر يتعرف على الوجوه ويقدر ينقل معلومات موقع الرحيق وجودته لاخواتهم ف الخلية برقصة اسمها رقصة الاهتزاز , وعندها مقدرة على عبور اعقد المتاهات وتسجيل موقع الرحيق عن طريق ذاكرة قصيرة المدى في مخها
كل ده بيحصل في اقل من مليون خلية عصبية وفي وزن مخ اقل مليون مرة من مخ الانسان !!!!
......
الثدييات العملاقة زي الحيتان ادمغتها بتفوق ادمغة البشر في الحجم والوزن , متوسط وزن مخ الحوت حوالي 10 كيلو لكن انت يا غلبان حوالي كيلو وشوية
طيب هل الحل مثلا فنسبة حجم المخ لحجم الجسم ؟
مش هنكر ان حجم مخ الانسان لحجم جسمه يعتبر كبير نسبيا وبالمقارنه فحجم المخ للجسم في الثدييات العملاقه هيكون فعلا اقل بكتير مننا وبيوصل لأقل من واحد على عشرة ف المية كنسبة ( زي الفيل الافريقي والحوت الازرق مثلا )
بس للأسف لا سبيل للعجرفة لإن هيجيلك بعض الثدييات الصغيرة زي مثلا حيوان ال shrews
ويتفوق علينا لان نسبة حجم مخه لجسمه حوالي 10% يعني اكبر مننا
حتى بعض الطيور ممكن تهزمنا ف التحدي ده فبلاش منه .
......
العلماء فضلوا فترة مفترضين ان الوعي وتميز العقل البشري يرجع لعدد الخلايا العصبية وان المخ البشري يحتوي على اكبر عدد من الخلايا العصبية مقارنة بأي كائن آخر لحد ما جت دراسة سنة 2014 حطمت الفرضية !!
في دراسة على 10 حيتان من نوع السمكة السوداء وده نوع من الدلافين بعد دراسة مخ الدلافين وجدوا ان عدد الخلايا العصبية في القشرة المخية بيتخطى ال 37 مليار خلية !!!!!!!!!!!
يعني المفروض الدلافين بالشكل ده تكون اذكى كائن على وجه الارض لو الموضوع بيعتمد على العدد , لكن بغض النظر عن ان الدلافين ذكية جدا جدا ومهاراتها متطورة وتقدر تتعرف حتى على نفسها ف المراية واجتماعية ومرحة جدا لكن معندهاش لغة تواصل ولا منطقية ولا قدرات عقلية زي البشر
طيب ايه الفرق
ايه اللي بيخلي مخ الانسان مميز
ايه اللي بيخلي مخ الانسان واعي ومنطقي ومحلل ؟
هل نوع الخلايا العصبية مختلف عن جميع الكائنات ؟
هل الخلايا العصبية في المخ البشري بتتواصل بينها وبين بعض بشكل اسرع او شكل اكثر تميزا من جميع الكائنات ؟
هل في سر معين ربنا اودعه في عقل الإنسان لم نتوصل اليه بعد ؟
ما زال البحث مستمرا ......
لو وصلت لهنا احب اشكرك على قراءتك واتمنى تشارك المقال

ليست هناك تعليقات